Góð stemning í Austurbæ

Það var ný lykt í loftinu í Austurbæ þegar Fréttablaðið bar að garði til að kíkja á fyrsta rennslið á söngleiknum Buddy Holly. Það er greinilegt að líf er komið í gamla Austurbæjarbíó en áætluð frumsýning á söngleiknum er í byrjun október.

„Þetta gengur vonum framar en það er bara vika síðan allur hópurinn hittist í samlestur svo það má segja að allt sé að smella,“ segir Gunnar Helgason leikstjóri brosandi með annað augað á sviðinu þar sem Ingólfur Þórarinsson, sem leikur aðalhlutverkið eða sjálfan Buddy Holly, er að æfa eitt lagið með hljómsveitinni.

„Hann er að standa sig mjög vel og má kannski segja framar öllum vonum. Ingó er svona að kynnast þessu leikhúslífi í fyrsta sinn og ég held að honum líki það ágætlega nema hann þolir ekki upphitunaræfingar leikara. Finnst eitthvað hallærislegt að þykjast synda og góla út í loftið til að hita sig upp,“ segir Gunnar og bætir við að Ingó sé nú vanur öðruvísi upphitunaræfingum úr fótboltanum.

Felix Bergsson fer með hlutverk The Big Bopper í sýningunni ásamt öðrum litlum hlutverkum. Gunnar og Felix eru vel þekkt tvíeyki og hafa unnið saman lengi „Það er mjög gaman að fá að leikstýra Felix en ég verð eiginlega að segja að hann er óþekkastur af öllum í hópnum. Þegar ég er að reyna að leikstýra er það hann sem er að pískra. Hann lætur illa að stjórn, allavega minni. Stundum,“ segir Gunnar hlæjandi en Felix ber Gunnari vel söguna

„Hann er alveg frábær leikstjóri og þetta er búið að vera mjög skemmtilegt hingað til. Klárir krakkar sem eru að stíga sín fyrstu skref og mjög góðir,“ segir Felix.

alfrun@frettabladid.is