Jack Sparrow óður í HM

Leikarinn Johnny Depp er nú staddur á Hawaii þar sem hann leikur sjóræningjann Jack Sparrow í fjórða skipti í myndinni Pirates of the Caribbean: On Stranger Tides.

Johnny er mikill áhugamaður um fótbolta og fylgist vel með HM í Suður-Afríku. Á milli taka hleypur hann að einhverjum þeirra fjölda flatskjáa sem búið er að koma upp á tökustað og fylgist með leikjunum.

Það er síðan Johnny til happs að í tökuliðinu eru margir Englendingar sem hafa einnig mikinn áhuga á mótinu og er HM-stemmningin því mikil.

Fjórða sjóræningjamyndin verður frumsýnd í maí á næsta ári. Í henni leita Jack Sparrow og Barbossa að lífsins lind og lenda í kapphlaupi við Svartskegg sjóræningja og dóttur hans. Geoffrey Rush leikur Barbossa eins og áður en það eru enski leikarinn Ian McShane og ofurskutlan Penélope Cruz sem leika Svartskegg og dóttur hans.