Beckhamhjónin vilja annað barn

Nú þegar ljóst er að knattspyrnukappinn David Beckham verður frá keppni í nokkra mánuði ætla hann og eiginkonan Victoria að gera hvað þau geta til að fjölga mannkyninu. Hjónin hefur nefnilega lengi dreymt um að eignast sitt fjórða barn. Þetta kemur fram í breska blaðinu The Daily Star.

Beckham meiddist illa á hásin í sigurleik AC Milan á Chievo í ítölsku úrvalsdeildinni síðastliðinn sunnudag. Undanfarna daga hefur hann verið í meðferð í Finnlandi vegna meiðslanna. Búist er við að Beckham verði í gifsi í meira en átta vikur og þá fyrst getur hann farið að huga að endurhæfingu. Hann mun ekki taka þátt í HM í Suður-Afríku í sumar.

Að sögn kunnugra hefur það verið draumur Beckhamhjónanna um nokkurt skeið að eignast litla telpu. Fyrir eiga þau þrjá stráka - Brooklyn 11 ára, Romeo sjö ára og hinn fimm ára gamla Cruz.