Hilmir Snær og Ingvar E. leiða saman hesta sína

„Það er óhætt að segja að leikhópurinn sé einstaklega glæsilegur,“ segir Magnús Geir Þórðarson, leikhússtjóri Borgarleikhússins, en nú er loks orðið ljóst hverjir skipa helstu hlutverk í jólasýningu Borgarleikhússins, Ofviðrinu eftir William Shakespeare. Tveir af fremstu leikurum þjóðarinnar, Hilmir Snær Guðnason og Ingvar E. Sigurðsson, verða í aðalhlutverkum í sýningunni en það er orðið ansi langt síðan þeir tveir voru á sviði saman. Og eitthvað sem eflaust margir hafa beðið eftir.

Hilmir og Ingvar hafa verið í hálfgerðum sérflokki í íslenskri leiklist undanfarin ár en á síðustu Grímu var Hilmir kjörinn besti leikstjórinn fyrir Fjölskylduna og Ingvar besti leikarinn en hann var bæði tilnefndur fyrir aðalhlutverk í Djúpinu og Íslandsklukkunni. Í aðalkvenhlutverkinu verður síðan Kristín Þóra Haraldsdóttir sem hefur slegið eftirminnilega í gegn í Gauragangi og var tilnefnd til Grímunnar fyrir frammistöðu sína.

Öllu verður tjaldað til fyrir þessa umfangsmiklu sýningu en leikstjóri hennar er hinn virti Oskaras Korsunovas. Magnús segir það mikinn heiður fyrir Borgarleikhúsið að hafa fengið þennan leikstjóra til liðs við sig. „Það er sannkallaður hvalreki fyrir okkur í Borgarleikhúsinu að fá þennan hæfileikaríka leikstjóra til að vinna með okkur,“ segir Magnús. Korsunovas fékk evrópsku leiklistarverðlaunin fyrir nokkrum árum og nýjasta sýningin hans fyrir Óperuna í Stokkhólmi hefur hlotið einróma lof. Hann gegnir stöðu leikhússtjóra Borgarleikhússins í Vilnius í Litháen.

Undirbúningurinn fyrir uppsetninguna hefur staðið í rúmt ár og Korsunovas hefur komið til Íslands í tvígang og séð átta sýningar. „Þannig fékk hann tækifæri til að sjá íslenska leikara og velja rétta hópinn,“ útskýrir Magnús en meðal annarra leikara má nefna Jörund Ragnarsson og Láru Jóhönnu Jónsdóttur úr Inspired by Iceland-myndbandinu en hún er nýkomin í hóp fastráðinna leikara hússins. Þröstur Leó Gunnarsson, Jóhann Sigurðsson, Jóhanna Vigdís og Guðjón Davíð Karlsson eru einnig meðal leikenda. „Það er valinn maður í hverju rúmi og við hlökkum öll mikið til að hefja æfingar,“ segir Magnús. Sýningin er sett upp í samstarfi við Íslenska dansflokkinn og koma allir dansarar hans við sögu í verkinu. Gert er ráð fyrir að æfingar hefjist í október en verkið verður frumsýnt um jólin.

freyrgigja@frettabladid.is