Ásdísi þykir fúlt að flytja frá Búlgaríu

Einstök lofgrein um Ásdísi Rán birtist í gær á vefsíðunni sofiaecho.com en það er ensk vefsíða með fréttum og fróðleik frá Búlgaríu. En Ásdís kveður senn landið og heldur til Bæjaralands í Þýskalandi þar sem eiginmaður hennar, knattspyrnukappinn Garðar Gunnlaugsson, mun leika með þýska 3. deildar liðinu SpVgg Unterhaching næstu tvö árin.

Blaðamaður vefsíðunnar segir það nánast hafa verið óhjákvæmilegt að taka eftir Ásdísi undanfarin ár, hún hafi verið áberandi í búlgörskum fjölmiðlum, andlit hennar hafi verið stanslaust á forsíðum blaðanna, nú síðast í búlgörsku útgáfunni af Playboy.

Ásdís er kölluð hin aríska ísdrottning og sagt að Búlgaría tapi mikið á því að missa hana yfir til Þýskalands sem að sama skapi græði mikið með nærveru hennar. Í stuttu spjalli við Ásdísi kemur jafnframt fram að hún og börnin séu enn ekki flutt yfir til Bæjaralands, þau séu enn að bíða eftir réttu íbúðinni og leikskólaplássi.

„Mér finnst leiðinlegt að þurfa að kveðja Búlgaríu, mér hafði tekist að koma undir mig fótunum. Það er pínulítið ógnandi að flytja til nýs land þar sem maður þekkir ekki neinn og verður að byrja allt upp á nýtt, það er eiginlega ömurlegt. En vonandi mun Þýskaland bjóða upp á einhver spennandi tækifæri sem ég get nýtt mér."-fgg