Ítalir treysta á hlutleysi Platini í baráttunni við Frakka um EM 2016

Það styttist óðum í að Knattspyrnusamband Evróu ákveði hvar Evrópukeppni í knattspyrnu fari fram árið 2016. Ítalir, Frakkar og Tyrkir keppast við að sannfæra UEFA-menn um að þeir geti haldið flottustu Evrópukeppnina til þessa en hún mun þarna innihalda 24 þjóðir í fyrsta skiptið. UEFA mun tilkynna það 28. maí hvar Evrópukeppnin mun fara fram eftir sex ár.

„Ég tel að Platini sé frábær forseti og sem forseti UEFA á hann að sjá til þess að ákvörðunin fari eftir því hvað sé best í stöðunni fyrir samtökin sem hann vinnur fyrir," sagði Giancarlo Abete, forseti ítalska knattspyrnusambandsins eftir tveggja daga kynningu ítalska framboðsins fyrir sendinefnd UEFA.

„Við höfum tvö sterk mótframboð frá Frökkum og Tyrkjum og allir seta sinn þjóðarstíl á sitt framboð. Við höfum spil upp í erminni og við erum að reyna að spila þeim í baráttunni um að fá að halda mótið," sagði Giancarlo Abete. Eitt af þessum spilum er greinilega að setja pressu á Platini þannig að landar hans njóti ekki þjóðartengslanna við forsetann.

Ítalir hafa ekki haldið stórmót síðan að þeir voru gestgjafarnir á HM 1990 en fjöldi vandamála tengdum fótboltanum, eins og skandallinn í tengslum hagræðingu úrslita sem og ólæti áhorfenda, eru ekki að hjálpa til í að fá EM 2016 til Ítalíu.