Rappmyndband með Audda, Sveppa og Magga Mix

Magnús Valdimarsson, öðru nafni Maggi Mix, sló nýlega í gegn á Netinu með skemmtilegum matreiðslumyndböndum sínum. Hann hefur síðan verið duglegur að koma fram í fjölmiðlum og er í viðtali í þætti Audda og Sveppa á föstudaginn.

Í tilefni af því brugðu félagarnir sér í graffitiklætt portið hjá Prikinu og tóku upp rappmyndband sem þeir settu á Netið í dag. Þó það sé stutt bregður fyrir góðum töktum.

„Eldamennskan er bara áhugamál og mig langaði að deila nokkrum uppskriftum með landanum. Þetta byrjaði bara með einu myndbandi fyrir þremur vikum sem varð svo vinsælt að ég ákvað bara að halda áfram. Ég fékk póst um daginn frá konu sem er búsett á Nýja-Sjálandi sem hrósaði mér fyrir framtakið og það virkar mjög hvetjandi á mig og fær mig til að vilja halda áfram," sagði Maggi í viðtali við Fréttablaðið um daginn.

Myndbandið er að finna á Facebook-síðu þeirra Audda og Sveppa.