Alþjóðleg hjólabrettakeppni í Reykjavík

„Þetta hefur aldrei verið haldið áður,“ segir Reynar Davíð Ottósson hjá Brim.

Verslunin heldur í dag, í samstarfi við Element sem er eitt stærsta hjólabrettamerki í heimi, hjólabrettakeppnina Make It Count, eða Láttu það skipta máli. Þessi alþjóðlega keppni verður haldin úti um allan heim á þessu ári og er Ísland engin undantekning.

„Þetta er þeirra innlegg í að gefa til baka í senuna. Þeir opna möguleika fyrir nýja hjólabrettastráka til að geta fengið styrk frá þeim. Sá sem vinnur hér fer út og keppir og þar verður fylgst vel með honum,“ segir Reynar Davíð.

Aðalverðlaunin verða ferð á úrslitakeppni Evrópu sem verður haldin í Belgíu 29. maí.

Hér heima verður keppt í tveimur flokkum, 13 ára og yngri og 14 ára og eldri, og fer mótið fram í Reykjavík Skatepark sem er í húsi við hliðina á Loftkastalanum.

Fimmtíu fyrstu sem skrá sig fá Element-stuttermabol auk þess sem allir fá Element-límmiða. Plötusnúður á mótinu verður Addi Intro og rapparinn Diddi Fel sér um að kynna herlegheitin. Reynar býst við helling af áhorfendum og þegar hafa á annað hundrað manns boðað komu sína.

Skráning á mótið hefst klukkan 15 í dag og hefst mótið klukkutíma síðar. - fb