Einar Már fær tíu þúsund danskar

Tilkynnt var í liðinni viku að rithöfundurinn Einar Már Guðmundsson hlyti viðurkenningu úr minningasjóði danska rithöfundarins og róttæklingsins Carls Scharnberg. Verðlaunin hlýtur Einar fyrir ritstörf sín og virka þátttöku í samfélagsumræðu.

Í umsögn valnefndarinnar segir meðal annars: „Einar Már Guðmundsson er einstakur maður. Í Hvítu bókinni sameinar hann skarpa samfélagsgreiningu og ljóðræna yfirsýn á óvenjulegan hátt, og í yfirstandandi deilu Íslendinga um leiðir út úr kreppunni er hann ötull talsmaður þess að fjármálafurstar og pólitíska valda- og fjölmiðlaelítan beri ábyrgð en ekki íslenska þjóðin." Verðlaunin nema 10.000 dönskum krónum og verða þau veitt við hátíðlega athöfn 9. júní næstkomandi.

Hvítbók Einars Más hefur þegar verið gefin út í Þýskalandi og Noregi auk Danmerkur og hlotið frábærar undirtektir, segir í tilkynningu frá forleggjara Einars hér á landi.