Hollendingar ósigraðir í 24 leikjum - Slógu Brasilíu út

Hollendingar slógu út besta lið heims samkvæmt styrkleikalista FIFA, Brasilíu, í átta liða úrslitum HM. Leiknum var að ljúka, með 2-1 sigri Hollands. Wesley Sneijder skoraði annað markið og átti hitt nánast skuldlaust.

Hollendingar hafa ekki tapað í súðustu 24 leikjum og unnið síðustu níu.

Joris Mathijsen meiddist í upphitun og því þurfti Andre Ooijer, hinn 35 ára gamli leikmaður PSV Eindhoven, að fylla í skarðið á síðustu stundu. Það gerði hann ekki vel í upphafi og Arjen Robben var næstur því að ná Robinho sem slapp í gegn.

Sendingin frá Gilberto Silva af miðjunni var mjög einföld og Robinho var langt á undan öllum. Hann kláraði færið vel og skoraði gott mark.

Hollendingar voru slegnir út af laginu og Brasilíumenn fengu fleiri færi. Kaká átti frábært skot sem Stekelenburg varði stórkostlega í markinu, Brassar áttu að fá víti og Juan skaut yfir úr markteignum.

Sóknir Hollendinga voru hugmyndasnauðar og staðan í hálfleik var 1-0, síst of stór forysta Brasilíu.

En í seinni hálfleik tóku Hollendingar sig á. Eftir rólegar upphafsmínútur skoraði Wesley Sneijder fyrir Holland, hann sendi boltann fyrir utan af kanti og bæði Felipe Melo og Julio Cesar markmaður stukku upp í boltann. Melo snerti hann en boltinn hafnaði í netinu og Sneijder fagnaði marki sem er þó skráð á Melo.

En skömmu síðar skoraði Sneijder mark sem skráist á hann, nú með skalla eftir hornspyrnu sem Dirk Kuyt flikkaði til hans. Eitthvað sem er greinilega beint af æfingasvæði Hollendinga.

Felipe Melo fékk réttilega rautt spjald fyrir að traðka á Arjen Robben í pirringi en skömmu áður brjálaðist hann þegar hann vildi fá aukaspyrnu sem ekki var dæmd. Melo ekki vinsælasti maðurinn í Brasilíu í dag.

Þrátt fyrir ágæta tilburði náði Brasilía ekki að jafna. Hollendingar því komnir í undanúrslit þar sem það mætir Úrugvæ eða Gana.

Hollendingar voru reyndar komnir þrír gegn markmanni í uppbótartíma en skoruðu ekki. Lokatölur 2-1.

Hollendingar verða án Nigel de Jon og Gregory Wan der Wijl í undanúrslitunum þar sem þeir fengu gult spjald og verða því í banni.