Hleypur í skarðið fyrir Bond-leikara og Gael Garcia Bernal

„Ég og leikstjórinn Vimukthi Jayasundara eigum sameiginlegan vin sem benti honum á mig,“ segir leikarinn Tómas Lemarquis.

Hann er staddur í Kolkata (Kalkútta) á Indlandi um þessar mundir að leika í stríðsmyndinni Mushrooms. Myndin samanstendur af þremur sögum og leikur Tómas landamærahermann í einni þeirra. Tómas flaug beint frá Belgrad þar sem hann sat í dómnefnd á kvikmyndahátíð en íslenski leikarinn hefur vakið töluverða athygli á Indlandi. Times of India birti meðal annars flennistórt viðtal við hann, sem Tómas segir hafa verið tekið á harðahlaupum með háværum bílflautum og öskrandi fólki í aukahlutverkum. „Blaðamaðurinn þurfti að geta ansi mikið í eyðurnar eins og sést.“

Athyglin er hins vegar skiljanleg, leikstjórinn Jayasundara þykir vera í fremstu röð indverskrar kvikmyndagerðar og hlaut meðal annars Gullnu kameruna á Cannes-hátíðinni fyrir fimm árum og keppti um Gullna ljónið á kvikmyndahátíðinni í Feneyjum á síðasta ári.

Tómas er í rauninni þriðji valkostur í hlutverkið en að því er ekki spurt í kvikmyndagerð. Fyrst stóð nefnilega til að mexíkóska stórstjarnan Gael Garcia Bernal léki hlutverkið. „Hann var hins vegar að fara að eignast annað barnið sitt og varð því að afþakka það.“

Þá kom til sögunnar pakistanski leikarinn Darwin Shaw sem margir muna eflaust eftir úr Bond-myndinni Casino Royal og Prince of Persia. „Hann náði hins vegar ekki að útvega sér réttu pappírana í tæka tíð,“ útskýrir Tómas. Shaw þessi er hálfur Pakistani og eins og flestum ætti að vera kunnugt um er grunnt á því góða milli þeirra þjóða. Samkvæmt indverskum fjölmiðlum reyndi Shaw að fá Sir Ben Kingsley til að hlaupa í skarðið fyrir sig. Það náðist hins vegar ekki í tæka tíð og því er Íslendingurinn Tómas Lemarquis nú kominn til Indlands. Tómas segist hins vegar ekki verða ríkur af þessu hlutverki, myndin sé gerð fyrir lítið fé og sé svokölluð „arthouse“-kvikmynd. Hann verður hins vegar á ferð og flugi á næstunni. „Fram undan er hlutverk í spænskri kvikmynd sem ég er búinn að bíða eftir í fjögur ár og er eftir leikstjórann Juan Carlos Medina. Svo var að koma upp annað verkefni í Þýskalandi, mjög spennandi, en þar sem ég er ekki búinn að skrifa undir vil ég ekki gefa neitt meira upp að svo stöddu.“freyrgigja@frettabladid.is