Umræður um bætt samfélag

Fátækt rædd á jafnræðisgrundvelli var yfirskrift fundar sem haldinn var á Grand Hóteli í gær. Fundurinn var haldinn í tilefni af Evrópu­ári gegn fátækt og félagslegri einangrun, en þar var stefnt saman stjórnmálamönnum, fagfólki í félagsþjónustu og fólki sem upplifað hefur fátækt og félagslega einangrun sjálft.

Yfir 80 manns tóku þátt og ræddu í hópum hvernig bæta má stöðu þeirra sem af einhverjum ástæðum standa illa fjárhagslega og félagslega. Meðal annars var fólk sammála um að innræta þyrfti virðingu og umhyggju fyrir samfélaginu.

„Það sem stóð upp úr er vilji fólks til að búa í samfélagi þar sem við tökum ábyrgð á hvert öðru og að allir hafi möguleika á að þroska hæfileika sína,“ segir Sigríður Ingibjörg Ingadóttir, starfandi formaður félags- og tryggingamálanefndar Alþingis. Hún sagði jafnframt niðurstöður fundarins mikil­vægt veganesti í vinnu stjórnvalda og fagfólks innan félagsmálageirans.

Margrét Einarsdóttir, eigandi nuddstofu í Reykjavík, sat fundinn sem talsmaður þeirra sem upplifað hafa fátækt og félagslega einangrun. Hún segir núverandi félagslegt kerfi letjandi. „Þeir sem af einhverjum ástæðum eru á atvinnuleysisbótum eða örorkubótum hafa ekkert svigrúm til dæmis til að prófa viðskiptahugmynd eða auka við menntun sína, án þess að missa bæturnar. Þessu þarf að breyta og gefa fólki tækifæri til að bjarga sér.“

Niðurstöðum fundarins verður komið áleiðis til ráðuneyta og sveitarfélaga af stýrihóp á vegum félags- og tryggingamálaráðuneytis sem stóð að fundinum. - rat