Dóri DNA flytur til Þýskalands

Rapparinn og uppistandarinn Dóri DNA segist þurfa á tilbreytingu að halda og flytur út eftir helgi.

„Ég flyt út á þriðjudaginn og hlakka mikið til,“ segir Halldór Halldórsson, betur þekktur sem Dóri DNA, en hann er flytja til Þýskalands í skiptinám. Dóri nemur fræði og framkvæmd við Listaháskóla Íslands en hann hyggst vera úti í hálft ár. „Ég er mikill heimalningur í mér svo þetta er í fyrsta sinn sem ég flyt út fyrir landsteinana – en finn að ég þarf á því að halda,“ segir Dóri og bætir við að íslenskur samtími sé svo sorglegur að hann hlakki bara til að sleppa við að lesa blöðin á morgnana og gráta yfir örlögum landsins síns. „Þetta er eitthvað sem maður verður að prufa en skólinn er í litlum bæ fyrir utan Frankfurt og við erum tveir frá Íslandi að fara í saman,“ segir Dóri og viðurkennir að það eigi eftir að slá aðeins á heimþrána.

Þegar Fréttablaðið náði af Dóra tali var hann staddur í New York þar sem hann hefur verið að vinna að viðtölum fyrir heimildarmyndina HKL ásamt móður sinni, Guðnýju Halldórsdóttur. „Þetta er búið mjög skemmtileg ferð þar sem við erum búin að lenda í vandræðum fyrir utan Hvíta húsið, skoða frelsisstyttuna og fara um upptökustaði The Wire-þáttanna,“ segir Dóri en hann kemur heim í dag í tæka tíð fyrir kveðjupartýið sitt sem haldið verður á Prikinu í kvöld. „Ég vonast til að sem flestir sjái sér fært að skála við mig í kvöld. Allir velkomnir,“ segir Dóri glaður í bragði að lokum.

alfrun@frettabladid.is