Íslenskur kvikmyndavetur

Kvikmyndagerðarmenn bíða nú eftir fyrstu úthlutun Kvikmyndasjóðs eftir að ríkisstjórnin ákvað að skera niður starfsemi Kvikmyndamiðstöðvar Íslands. Laufey Guðjónsdóttir, framkvæmdastjóri Kvikmyndamiðstöðvar, segir íslenska kvikmyndagerð búa við algjörlega nýtt landslag.

Innan kvikmyndagerðarbransans er talað um að það hafi kólnað ansi hratt í iðnaðinum að undanförnu. Tvær sjónvarpsþáttaraðir hafa fengið vilyrði fyrir styrk frá Kvikmyndamiðstöð og ekki er reiknað með að fleiri verði um þá köku.

Þetta eru Tími nornarinnar sem Friðrik Þór Friðriksson leikstýrir eftir samnefndri bók Árna Þórarinssonar og svo Betlehem eftir Dag Kára Pétursson sem Ljósbandið framleiðir. Gert er ráð fyrir því að þær fari í tökur á þessu ári en Betlehem verður sýnd á Stöð 2 og Tími nornarinnar á RÚV.

Ekki má heldur gleyma grínheimildarþáttaröð Gunnars Hanssonar og alter-egósins hans, Frímanns Gunnarssonar, um norrænan húmor, en þær tökur eru á lokastigi. Þá er tökum á Rétti 2 að ljúka. Á teikniborðum íslenskra handritshöfunda eru þó þættir á borð við Pressu 2 sem Sigurjón Kjartansson og Jóhann Ævar Grímsson eru byrjaðir að skrifa og svo Jói og Gói með þeim Jóhannesi Hauki og Guðjóni Davíð Karlssyni í aðalhlutverkum. Ekki er þó ljóst hvenær þessir þættir fara í framleiðslu.

Þrjár kvikmyndir hafa fengið vilyrði fyrir styrk frá Kvikmyndamiðstöð. Þetta eru Djúpið eftir Baltasar Kormák, Gauragangur í leikstjórn Gunnars Björns Guðmundssonar og Okkar eigin Osló sem Reynir Lyngdal leikstýrir. Eftir því sem Fréttablaðið kemst næst er mjög líklegt að ekki muni fjölga í þessum flokki á næstunni.

Laufey segir að upphæð styrkja úr Kvikmyndasjóði verði sú sama og eftir hrun, það verði hins vegar færri kvikmyndagerðarmenn sem fái úthlutað.

„Þetta er ástand sem reynir á þolmörk íslenska bransans en ég trúi því að ef okkur tekst að gera þrjár til fjórar kvikmyndir á ári að þá höldum við fagfólkinu inni í landinu," segir Laufey.

Menntamálaráðherra tilkynnti nýverið að 88 milljónum sem fundust í menningarsjóði útvarpsstöðva yrði úthlutað til íslenskrar dagskrárgerðar, bæði í útvarpi og sjónvarpi.

„Ég er þessa dagana að skipa í stjórn, það ætti að klárast í þessari viku og síðan verður vonandi auglýst eftir umsóknum í mars seinna í þessum mánuði," segir Katrín Jakobsdóttir menntamálaráðherra í samtali við Fréttablaðið. Þær upphæðir, þótt lágar séu, eiga eflaust eftir að koma að góðum notum.

freyrgigja@frettabladid.is