Frumflutt verk hjá Caput

Á morgun kl. 17 verður helsta súpergrúppa landsins, Caput, að spila í Sölvhóli, sal Listaháskóla Íslands við Sölvhólsgötu, og verða sjö ópusar á efnis-skránni. Tónleikarnir eru samstarfsverkefni við tónlistardeild Listaháskólans.

Meðal þeirra verka sem flutt verða í gamla Landsmiðjuhúsinu er Luminous Flux eftir hið margverðlaunaða kóreska tónskáld Sungji Hong. Verk hennar hafa verið flutt um allan heim. Eftir japanska tónskáldið Malika Kishino verður svo leikið verkið Himmelsleiter, eða Himnastiginn. Hvorugt þessara verka hefur áður heyrst hér á landi. Þá verður flutt slagverkssóló eftir gríska tónskáldið Iannis Xenakis sem hér er að góðu kunnugt.

Við þetta tækifæri verður einnig frumflutt glænýtt einleiksverk fyrir óbó eftir Þuríði Jónsdóttur, sem nýlega var tilnefnd til Tónlistarverðlauna Norðurlandaráðs, sem og verkið Krónan eftir Hafdísi Bjarnadóttur, en það hefur áður verið flutt erlendis. Síðast en ekki síst leikur Caput-hópurinn ný verk eftir tvo nemendur tónsmíðadeildar LHÍ, þá Þorbjörn G. Kolbrúnarson og Junichi Matsumoto.

Starfsárið hjá Caput-hópnum er komið á fullt skrið. Það sem af er ári hafa verið haldnir tvennir umfangsmiklir tónleikar, þeir fyrstu á Myrkum músíkdögum í lok janúar og um síðustu helgi var frumflutningur á Hallgrímspassíu Sigurðar Sævarssonar í Njarðvíkurkirkju. Verður passían endurflutt á Kirkjulistahátíð í Hallgrímskirkju í byrjun apríl svo þar gefst áhugasömum að heyra hana.

Viku seinna, 21. mars, leikur Caput á vegum Tóneyjar í Gerðubergi, dagskrá byggða á lögum eftir Guðna Franzson við sögu Guðrúnar Helgadóttur, Ástarsögu úr fjöllunum, og verður söngvarinn Egill Ólafsson þar í aðalhlutverki. Þá eru fram undan í maí tónleikar þar sem frumfluttir verða tveir nýir íslenskir einleikskonsertar: píanókonsert eftir Hauk Tómasson (einleikari Víkingur Heiðar Ólafsson) og konsert fyrir kontrabassa eftir Snorra Sigfús Birgisson (einleikari Hávarður Tryggvason) en Snorri verður jafnframt stjórnandi á tónleikunum. Um miðjan maí verður önnur dagskrá Tóneyjar í Gerðubergi, en þá syngur Guðrún Jóhanna Ólafsdóttir mezzosópran ásamt Caput-hópnum verk Hauks Tómassonar, sönglagaflokkinn Grannmetislög, við texta eftir Þórarin Eldjárn.

Flokkurinn hefur sent frá sér nokkra diska á undanförnum misserum: Verkið Örsögur eftir Hafliða Hallgrímsson sem byggt er á sögum eftir Daniil Kharms kom út nú í desember hjá fyrirtækinu Signum Records. Sögumaður er Simon Callow. Diskurinn Funkhaus-Konzerte, sem gefinn er út af WDR-ríkisútvarpsstöðinni þýsku og inniheldur upptökur frá tónleikum í Köln frá því í apríl 2009 er einnig kominn út. Var Caput-hópnum boðið að koma fram á tónleikunum til að frumflytja verkið Area eftir Günter Steinke, prófessor í tónsmíðum í Essen, en það er samið sérstaklega fyrir Caput.

Flaututónlist Toshio Hosokawa, í flutningi Kolbeins Bjarnasonar og Caput-hópsins undir stjórn Snorra S. Birgissonar, kemur út hjá Naxos í desember á þessu ári og tónverkin Tears of Dionysius eftir danska tónskáldið Lars Graugaard og samnefnd og umdeild kvikmynd koma út saman á næstunni í CD- og DVD-formi. Verkin voru frumflutt í Háskólabíói á Listahátíð árið 2006.

pbb@frettabladid.is