Afþakkar hlutverk fíkils

Leikkonan Lindsay Lohan hafði verið ráðin til að leika klámmyndastjörnuna Lindu Lovelace í kvikmyndinni Inferno en fyrir stuttu var hætt við þau áform. Sögusagnir voru uppi um að leikstjóri kvikmyndarinnar hafi ekki viljað ráða Lohan vegna slæmrar ímyndar hennar.

Dina Lohan, móðir Lindsay, segir þó í viðtali við vefsíðuna RadarOnline.com að dóttir hennar hafi sjálf ákveðið að draga sig úr verkefninu því hún hafi ekki getað hugsað sér að leika fíkil eftir öll vandræði sín. „Myndin fjallar um klámmyndaleikkonu sem er háð eiturlyfjum. Eftir allt það sem Lindsay hefur gengið í gegnum þá væri mjög erfitt fyrir hana að demba sér í slíkan karakter. Henni þótti mjög erfitt að hætta við því þetta er frábært hlutverk,“ sagði móðir leikkonunnar sem segir hana þó hafa úr nægum verkefnum að velja.