Diskóið læknar svínaflensuna

Eftir fimm ára hlé snýr Margeir Ingólfsson aftur með sitt vinsæla diskókvöld á annan í jólum. Tilefni endurkomunnar er skinkuvandmál unglingsstúlkna í tengslum við svínaflensuna og ævisaga hans sem var rituð í hans óþökk.

Diskókvöld Margeirs voru haldin tíu ár í röð og nutu mikillar hylli þangað til plötusnúðurinn ákvað að setja þau í salt. Núna, fimm árum síðar, hefur hann snúið aftur og í þetta sinn verður diskóið á skemmtistaðnum Austur á annan í jólum.

„Ég var eiginlega búinn að ákveða að enda ekki sem enn einn glataði gaurinn sem kemur með kombakk á súlnasal Hótels Sögu. En það má eiginlega segja að það sem hafi rekið mig af stað aftur var að ég rakst á tilkynningu frá sóttvarnalækni um að á landinu hafi greinst skætt tilvik svokallaðrar svínaflensu,“ útskýrir Margeir. „Þessi skæða veirusýking herjar aðallega á unglingsstúlkur og lýsir sér þannig að hárið á þeim aflitast og andlitið á þeim verður appelsínugult. Þær skinkast sem sagt upp á metttíma. Það er ljóst að hraði og eðli útbreiðslunnar gefur tilefni til að hafa miklar áhyggjur og þess vegna taldi ég skyldu mína að bregðast við. Það má segja að það sé ákveðið samfélagsverkefni þessi endurkoma því diskóið læknar skinkur.“

Önnur ástæða er einnig fyrir endurkomunni að sögn Margeirs: „Ég frétti af því að kunnur ævisagnaritari hér í bæ, Ingólfur Margeirsson, maðurinn sem allir halda að sé pabbi minn, hafi komist í dagbókina mína og hafist handa við að rita ævisögu mína án þess að láta mig vita og ætlað að gefa hana út fyrir jólin,“ segir hann. „Það var í raun í ljósi þessara tveggja atriða sjálfgefið að slá upp eins og einum diskódansleik.“

freyr@frettabladid.is