Boðið til Kaupmannahafnar

Myndin Backyard sem var frumsýnd á opnunarkvöldi Bíós Paradísar í síðustu viku verður sýnd á heimildar­myndahátíðinni CPH:DOX í Kaupmannahöfn í nóvember.

„Þetta er æðislegt. Þetta er hátíð sem leggur svolitla áherslu á tónlist í kvikmyndum og tónlistartengdar myndir. Þetta er hátíð sem er svolítið að banka á A-listann,“ segir leikstjórinn Árni Sveinsson. Backyard keppir í flokknum Sound & Vision en sigurvegari í fyrra var Frakkinn Vincent Moon sem verður gestur RIFF-hátíðarinnar. Árið 2008 vann í sama flokki mynd um rokksveitina Anvil sem hefur vakið mikla athygli.

Backyard fjallar um nokkrar íslenskar hljómsveitir sem tengjast vináttuböndum og starfa mikið saman, þar á meðal FM Belfast, Hjaltalín, múm, Retro Stefson, Reykjavík!, Sing Fang og Borko. Nokkrar þeirra munu ferðast til Kaupmannahafnar í tengslum við hátíðina og halda þar tónleika.

Árni er mjög ánægður með viðtökurnar við Back­yard og segir þær framar vonum. „Það er ekkert sjálfgefið fyrir svona litla heimildarmynd að opna svona bíó (Bíó Paradís) og fá að vera með sýningar þar. Þannig að við erum bara hæstánægð.“

Hlé verður nú gert á sýningum Backyard vegna RIFF-hátíðarinnar en að henni lokinni halda sýningar áfram, meðal annars á Airwaves-hátíðinni. Í tengslum við þær sýningar verða haldnar uppákomur þar sem hljómsveitir úr myndinni stíga á svið. - fb