Nýja Weezer-platan heitir Hurley

Næsta plata hljómsveitarinnar Weezer nefnist Hurley og kemur út um miðjan september. Þetta verður áttunda plata sveitarinnar og fylgir hún í kjölfar Raditude sem kom út í fyrra. Weezer yfirgaf útgáfurisann Geffen á síðasta ári og kemur nýja platan út hjá fyrirtækinu Epitaph Records.

„Á þessum tímapunkti á ferli okkar þurfum við ekki á stóru plötufyrirtæki að halda,“ sagði forsprakkinn Rivers Cuomo. Tónlistarmaðurinn Ryan Adams tók þátt í að semja eitt lag á plötunni. Þar verður einnig lagið Time Flies eftir Mac Davis, höfund In The Ghetto með Elvis Presley frá árinu 1969.