Mariah Carey ólétt af sínu fyrsta barni

Mariah Carey á von á barni. Þetta kemur fram á fréttamiðlinum Radar Online, sem hefur þetta eftir heimildarmanni sem ku vera tengdur Carey og eiginmanni hennar, skemmtikraftinum Nick Cannon.

Carey og Cannon endurnýjuðu hjúskaparheitið í maí þannig að nýjustu fréttir af hjónakornunum koma ekki á óvart. „Þau eru bæði mjög spennt og hamingjusöm," er haft eftir heimildarmanninum.

Fjölmiðlafulltrúi Carey neitar ekki fréttinni og sagði í samtali við Radar að hún hefði ekki leyfi til að ræða persónuleg málefni Mariuh Carey að svo stöddu. „Mariah og Nick vilja halda þunguninni leyndri eins lengi og þau geta," sagði heimildarmaðurinn enn fremur.