Spurningaljónið úr Garðabæ

„Þetta er bara mjög gaman,“ segir Elías Karl Guðmundsson sem vakið hefur mikla athygli fyrir framgöngu sína í spurningakeppnum í sjónvarpi undanfarið. Elías komst í úrslit Útsvars fyrir viku sem liðsmaður Garðabæjar en hann var þá þegar kominn í úrslit Gettu betur með framhaldsskóla sínum, MR. Það skýrist í kvöld hverjir verða mótherjar Garðabæjar-liðsins en þá keppa lið Reykjavíkur og Reykjanesbæjar. Á morgun kemur hins vegar í ljós hvort það verður MR eða erkifjendur þeirra úr Verzló sem hreppa hljóðnemann fræga í þessari sívinsælu spurningakeppni framhaldsskólanna.

Elías segir að áhuginn á spurningakeppnum hafi kviknað snemma hjá sér.

„Já, þetta kemur alveg aftan úr æsku, ég held að ég hafi verið fimm ára þegar ég varð fyrst var við þennan áhuga,“ segir Elías en áréttar þó að fjölskyldan hafi ekki spilað mikið af spurningaspilum. Enda yrði væntanlega um ójafnan leik að ræða um þessar mundir.

Elías segir spurningakeppnirnar taka töluverðan tíma frá hefðbundnu námi í MR en hann reyni þó alltaf að sinna því eins og hann getur. Hvað sérsviðið varðar segir Elías að það séu bara áhugamálin, íþróttir og landafræði, en mikla athygli vakti í einum Útsvars-þættinum þar sem Elías þuldi upp helstu eyðimerkur jarðkringlunnar.

Spurningakeppnisstjarnan segir það tvennt ólíkt að taka þátt í Útsvari og Gettu betur. „Andrúmsloftið er miklu afslappaðra í Útsvari, það er meiri fiðringur í maganum fyrir Gettu betur,“ útskýrir hann en bætir því þó við að liðsfélagi sinn í Garðabæjarliðinu, Vilhjálmur Bjarnason, taki Útsvarið engum vettlingatökum og haldi liðsmönnum á tánum. „Nei, hann er mjög kröfuharður, er með svakalegt keppnisskap og leyfir ekkert rugl.“freyrgigja@frettabladid.is