Krakkarnir í Hvolsskóla heiðraðir

Umhverfisráðherra veitti þrjár viðurkenningar fyrir störf á sviði umhverfismála á degi umhverfisins í gær. Sigrún Helgadóttir hlaut náttúruverndarviðurkenningu Sigríðar Brattholt, sem veitt var í fyrsta skipti. Verðlaunin hlaut Sigrún meðal annars fyrir það að miðla umhverfisfræðslu til barna og ungmenna, með námsefni og verkefnastjórn Grænafánaverkefnisins á árunum 2000-2008.

Þá fékk prentsmiðjan Oddi afhenta umhverfisviðurkenninguna Kuðunginn fyrir framlag sitt til umhverfismála og nemendur Hvolsskóla voru útnefndir varðliðar umhverfisins, sem er verkefnasamkeppni í umhverfisvernd.

- jma