Kettir hverfa einn af öðrum í Mosfellsbæ

„Ég hef ekki aðra kenningu en þá að það hljóti að vera einhver sem er hreinlega að drepa þessa ketti," segir Frímann Lúðvíksson Buch, sem missti fjóra ketti af heimili sínu á aðeins einni viku.

Frímann tvífótbrotnaði og handleggsbrotnaði fyrir um hálfum mánuði í mótorhjólaslysi og er nú að jafna sig á heimili sínu og Kristínar Jónasdóttur í Brattholti í Mosfellsbæ.

Daginn eftir að Frímann slasaðist hvarf fyrsti kötturinn. „Það var Kameron sem fór út eins og venjulega og hefur ekki sést aftur. Næsta þriðjudagsmorgun, þegar ég var kominn heim af spítalanum, hurfu svo Tina, Mia og Torres á einu bretti," segir Frímann.

Að sögn Frímanns er elsti kötturinn sem hvarf tólf ára gömul læða. Allir séu þeir alvanir að fara sinna ferða og hafi ávallt skilað sér aftur. Fjölskyldan hafi hringt í alla hugsanlega aðila til að hafa upp á köttunum en án árangurs.

„Ofan á þetta kom til okkar kona, sem býr í næsta húsi, alveg miður sín og sagði að hennar köttur hefði horfið á sumardaginn fyrsta og hvorki sést tangur né tetur af honum síðan. Og frá þessum tíma hefur konan mín heldur ekki séð kött sem var vanur að koma á pallinn til okkar," útskýrir Frímann en tekur þó fram að enn séu kettir á sínum stað í sumum húsum í næsta nágrenni.

Eins og fyrr segir hallast Frímann að því að dularfulla kattahvarfið sé af mannavöldum. „Ég vona þá að þeir séu allir dánir og að það sé ekki einhver að kvelja þá og pína eins og hefur nú þekkst," segir hann.

Af þremur köttum þeirra hjóna sem eftir eru er ein persalæða, Kamilla, sem lætur aðeins sjá sig einstaka sinnum utandyra. Bambi og Sponsa fara enn þá út eins og þau eru vön. „Við erum logandi hrædd um að þau skili sér ekki aftur," segir Frímann.

Emilía Helga Þórðardóttir, nágranni Frímanns, staðfestir að lítil hvít læða að nafni Bettý hafi horfið á sumardaginn fyrsta. „Maður heldur enn í vonina en síðan ég frétti af hinum köttunum sem hurfu hefur verið að læðast að manni illur grunur, því miður. Þetta getur varla verið tilviljun," segir Emilía.

Hjá dýraeftirliti Mosfellsbæjar fengust þær upplýsingar að ekki hafi verið óvenju margar tilkynningar um týnda ketti í bænum að undanförnu.

gar@frettabladid.is