Fyrsta plata Ladda í 20 ár

Tónlistarferill Ladda hefur setið á hakanum lengi, en nú verður breyting þar á: Ný plata með honum, sú fyrsta síðan Of feit fyrir mig kom út árið 1990, er væntanleg í júní.

„Það er komið langt útgáfuhlé, ég veit nú bara ekki hvað veldur. Ég kom mér bara aldrei að þessu, einhvern veginn. Svo var farið að þrýsta á mann með plötu, og alltaf meira og meira, svo ég sagði bara ókei á endanum,“ segir Laddi. Platan verður ekta Ladda-plata á léttu nótunum með erlendum lögum í bland við frumsamin, en Laddi gerir alla texta.

„Nei, nei, þetta er ekki konsept-plata um bankahrunið, enda væri það nú bara leiðinlegt!“ segir Laddi. „Þetta eru bara skemmtileg lög og skondnir textar. Það koma einhverjir karakterar við sögu, Eiríkur Fjalar, Saxi læknir og Mói til dæmis. Platan var tilbúin fyrir nokkru en það var svo mikið annað að gerast hjá mér að það var ákveðið að fresta henni. Svo ákváðum við að bæta einu lagi við sem við erum að taka upp núna. Fyrstu lögin af plötunni ættu að fara að heyrast bráðlega.“

Plötuna gerir Laddi með Björgvini Halldórssyni í Hljóðrita í Hafnarfirðinum. „Við byrjuðum á þessu fyrir ári síðan. Bó treður sér auðvitað að og tekur allar bakraddir. Platan heitir Bland í poka enda eru alls konar lög á henni. Eiríkur Fjalar er til dæmis með eldgamalt fyndið lag, „Flying purple people eater“.

Hjá mér er það um kakkalakka. Ég fékk þá hugmynd á Majorka fyrir einu og hálfu ári síðan eftir að við fundum kakkalakka í íbúðinni okkar. Svo eru þarna lög eftir mig sem eru í mínum anda, ekkert rosalega mikið grín, en skondnir textar.“

Platan á að koma út 10. júní og Laddi er spenntur.

„Ég held að þetta sé fín plata. Ég er allavega mjög bjartsýnn. Við erum að ræða málin hvernig sé best að fylgja henni eftir. Það stendur jafnvel til að gera eitt myndband. Eða tvö.“

drgunni@frettabladid.is