Röddin aldrei verið betri

Ómar Ragnarsson heldur tvenna tónleika í Salnum í tilefni af sjötugsafmæli sínu. Hann lofar fjöri frá upphafi til enda.

„Hinn óbærilegi léttleiki síðustu fimmtíu ára á að skila sér áratug fyrir áratug á þessari skemmtun,“ segir Ómar Ragnarsson um tónleika sína í Salnum á fimmtudag og föstudag. Tilefnið er sjötugsafmælið hans á fimmtudaginn og sú staðreynd að fimmtíu ár eru liðin síðan hann gaf út sína fyrstu plötu. Raggi Bjarna og Þuríður Sigurðardóttir stíga einnig á svið ásamt Sumargleðinni og hljómsveitinni Miðaldarmönnum.

25 ár eru liðin síðan Ómar hélt vel heppnaða afmælistónleika á Broadway og í Sjallanum. Þeir fyrrnefndu urðu fjörutíu talsins en hinir urðu sautján. Nú þegar 25 ár eru liðin segist Ómar vera í fínu formi og engu hafa gleymt. „Röddin hefur sennilega aldrei verið betri. Ég fór svo illa með hana þessi ár en ég fer betur með hana núna vegna þess að allt stendur og fellur með henni,“ segir hann. „Þetta verður fjör frá upphafi til enda.“

Ómar segir að megnið af lögunum hafi aldrei heyrst nema í stuttan tíma. „Það sérkennilega við minn feril er að ég hef verið að skipta um prógram á hverju ári. Sem þýðir að margt af því besta sem ég hef gert hefur bara verið flutt í eitt ár á skemmtunum og aldrei verið gefið út á plötu eða flutt á tónleikum,“ segir hann. „Ég tek „Torfærukeppnina“ og bílarnir fara í loftköstum og hesturinn fer í lofköstum með mig þegar ég tek það lag. Elli Pressis á eftir að taka miklar sveiflur á sviðinu og „Sveitaball“ verður tekið í lokin nákvæmlega eins og það hefur verið gert í fimmtíu ár. Sigtryggur glímukappi á líka eftir að vera með miklum þunga þarna.“

freyr@frettabladid.is