Vill ekki tala um Lady Gaga

Adam Lambert, stjarnan úr American Idol, er orðinn þreyttur á að tala um vinkonu sína, Lady Gaga, í viðtölum. Stutt er síðan hann sagðist hafa spjallað við hana yfir viskíglasi og eftir það hafa fjölmiðlar viljað vita meira um vináttu þeirra.

„Ég var að ljúka við þriðja þýska viðtalið mitt þar sem mér var sagt að ég hefði lýst því yfir að ég væri karlkyns útgáfan af Lady Gaga. Það myndi ég aldrei segja. Ég er Adam Lambert,“ sagði hann á Twitter-síðu sinni. „Auðvitað er ég aðdáandi hennar og ég ber mikla virðingu fyrir henni. Sviðsframkoma okkar beggja er ættuð úr leikhúsinu en við erum gjörólíkar manneskjur,“ sagði hann og hélt áfram: „Fyrsta spurningin hjá alltof mörgum fréttamönnum tengist Gaga. Þó að mér þyki vænt um hana er þetta orðið þreytandi. Mig langar frekar að tala um mína tónlist og ég er viss um að hún er á sama máli.“

Lambert hefur einnig beðið fréttamenn um að hætta að spyrja sig um hvernig það var að hitta Madonnu, hvort hann hafi verið beðinn um að syngja með Queen og hvort hann hafi kysst söngkonuna Keshu. „Mér finnst gaman að fara í viðtöl og ég er ekkert pirraður yfir því en ég vona bara að með þessum skilaboðum mínum fækki þessum spurningum.“

Næsta útgáfa Lamberts verður endurhljóðblönduð EP-plata og er hún væntanleg í næsta mánuði.