Rómantískir skartgripir fyrir skó komnir í sölu

Elísabet Björgvinsdóttir var orðin leið á hinum hörðu og köldu tískustraumum. Hún ákvað því að lífga upp á þetta, hannaði eigin tískulínu sem hún selur í eigin netverslun á slóðinni Babette.is.

„Ég var komin með ógeð á öllum svörtu skónum mínum og langaði að flikka upp á skóskápinn minn. Það má eiginlega kalla þetta skartgripi fyrir skó," segir Elísabet, sem nýverið opnaði búð á Netinu þar sem hún sýnir sitt eigið merki, Babette. Sjá má alls kyns útgáfur af skóskartinu í myndasafninu hér fyrir neðan.

Hún hannar jakka, slár, sokka og fleira samhliða skóskartinu. Babette er bein þýðing af nafninu Elísabet á frönsku, en innblástur hönnunarinnar kemur frá Parísartískunni sem Elísabet er mjög heilluð af. Fallegir litir og munstur einkenna hönnunina og Elísabet notar kanínuskinn, leður, kögur og blúndur í skóskartið. Innblásturinn er komin frá skóhlífunum sem herramenn notuðu í upphafi 19. aldar til að verja skóna sína. Skóskartið er hins vegar meira til skrauts en varnar.

„Ég var orðin leið á því hvað íslensk hönnun er oft grá og dimm. Allt of mikið um svartar flíkur og harða, kalda tískustrauma. Mig langaði að lífga aðeins upp þetta og koma með smá rómantík inn á markaðinn. Okkur á Íslandi veitir ekki af."

Mikil gróska er í íslenskri hönnun um þessar mundir og fingrafimir einstaklingar farnir að hleypa hönnun sinni út fyrir veggi heimilisins. Elísabet hræðist hvorki samkeppni né samdrátt. „Ég er bjartsýnismanneskja að eðlisfari og hugsaði bara af hverju ég ætti ekki að geta gert þetta eins og aðrir. Það er mjög gaman að sjá hvað það er mikið um hæfileikaríkt fólk á Íslandi," segir hún. Verslunin KronKron er í sérstöku uppáhaldi hjá henni.

Elísabet er heimavinnandi með tvo litla stráka og finnst yndislegt að geta sinnt áhugamáli sínu að vild en stefnir jafnframt langt. Hún ætlar að taka þátt í hinum geysivinsæla Pop Up-markaði síðar í sumar þar sem nálgast má hönnun hennar.

alfrun@frettabladid.is