Hemmi Hreiðars gripinn á 175 km hraða

„Þetta er ekki mitt stærsta áhyggjuefni um þessar mundir," segir Hermann Hreiðarsson, landsliðsfyrirliði og leikmaður Ports­mouth í ensku úrvalsdeildinni. Hann var gripinn af lögreglunni í Bournemouth fyrir of hraðan akstur á A35 Puddletown-afleggjaranum í Dorset. Leyfilegur hámarkshraði þar er 70 mílur, eða 112 kílómetrar á klukkustund, en samkvæmt mælingum lögreglunnar reyndist Hermann vera á 175 kílómetra hraða.

Málið var tekið fyrir í héraðsdómi Bournemouth á þriðjudaginn en Hermann var ekki viðstaddur. Hins vegar mætti lögfræðingur hans á svæðið og lýsti skjólstæðing sinn saklausan. Málið verður tekið fyrir 2. júlí.

Hermann var tekinn 3. október, sama dag og Portmouth lagði Úlfana í erfiðum útileik. Þetta var fyrsti sigur liðsins á keppnistímabilinu og Hermann viðurkennir að hafa gleymt sér aðeins í sigurvímunni.

„Þetta er ekkert stórmál," segir Hermann en komist héraðsdómur að þeirri niðurstöðu að hraðaksturinn hafi átt sér stað gæti Hermann misst ökuskírteinið í fjórar vikur og fengið sex punkta.

Hermann hefur átt við erfið meiðsl að stríða á yfirstandandi leiktíð en fjárhagslegt ástand félagsins hefur heldur ekki verið upp á marga fiska. Yfirvofandi gjaldþrot hefur hangið eins og draugur yfir liðinu en mál þess ættu að skýrast í þessari viku. Líklegt er að níu stig verði dæmd af liðinu sem þýðir væntanlega að fall úr úrvalsdeildinni er nánast óumflýjanlegt.

„Við verðum bara að taka alla leiki sem eftir eru," segir Hermann. - fgg