Butler laug að mömmu að hann væri trúlofaður Aniston

Skoski leikarinn Gerard Butler fékk hjálp frá Jennifer Aniston, meðleikkonu hans úr The Bounty Hunter, til þess að gabba mömmu sína.

Sögusagnir gengu um að Butler og Aniston ættu í ástarsambandi. Þau gáfu sögusögnunum byr undir báða vængi þegar þau ákváðu að fara saman til Mexíkó daginn sem Aniston átti afmæli. Þau hafa hins vegar bæði neitað sögusögnunum, en Gerard nýtti sér þær til að ljúga að mömmu sinni að hann væri á leið í hjónaband.

„Ég hringdi í mömmu og sagði henni að ég ætti svolítið annríkt því ég væri að fara að giftast Jennifer Aniston," segir Butler. Hann sagði að Jennifer hefði síðan hringt í móður sína og kynnt sig sem tengdadóttur. Gerard sagði við tímaritið OK að mamma sín hefði orðið verulega spennt því hún vildi gjarnan að hann gengi í hjónaband.