Árni ætlar að áfrýja

Árni Mathiesen hyggst áfrýja dómi Héraðsdóms Reykjavíkur en hann ásamt íslenska ríkinu var gert að greiða Guðmundi Kristjánssyni, lögfræðingi, þrjár og hálfa milljón króna óskipt vegna skipunar Þorsteins Davíðssonar sem héraðsdómara á Norðurlandi eystra 2007.

Guðmundur sótti um starfið árið 2007 og var metinn hæfastur ásamt tveimur öðrum umsækjendum af sérstakri dómnefnd. Þorsteinn var aftur á móti metinn tveimur flokkum neðar í hæfni.

Lögmaður Árna vildi ekki tjá sig efnislega um málið fyrr en dómur Hæstaréttar fellur. Þá vildi Árni, sem þá var fjármálaráðherra, ekki heldur tjá sig um málið en hann var settur dómsmálaráðherra vegna ráðningarinnar þar sem Björn Bjarnason var óhæfur en Þorsteinn hafði unnið hjá ráðuneytinu.