Fjallabræður syngja í Manchester

„Við erum mígandi spennntir að kynna land og þjóð á erlendri grundu,“ segir Halldór Gunnar Pálsson, kórstjóri Fjallabræðra, sem syngja á evrópskri menningarhátíð í Manchester 30. maí.

Það var fyrir milligöngu Inga Þórs Jónssonar, sem hefur skipulagt norræna menningarhátíð í Liverpool undanfarin ár, sem Fjallabræður fengu giggið. Að sögn Inga Þórs verða tónleikarnir á aðalsviði hátíðarinnar, öfugt við aðra norræna flytjendur sem verða á sérstöku norrænu sviði. „Ég fór með þessa hugmynd til þeirra á fund og þeim finnst þeir algjört æði,“ segir Ingi Þór um skoðun forsvarsmanna hátíðarinnar á Fjallabræðrum. „Núna þurfa þeir að fara að safna karlarnir og vonandi geta þeir komið af stað jákvæðri umfjöllun um Íslendinga.“ Búist er við á milli 30 og 40 þúsund manns á hátíðina og hefur hún fengið góða umfjöllun í gegnum árin, meðal annars hjá breska ríkisútvarpinu, BBC.

Tónleikar Fjallabræðra í Manchester verða þeir fyrstu hjá sveitinni utan landssteinanna. „Við gerðum heiðarlega tilraun til að fara til Færeyja síðasta sumar og syngja á G-Festival en við náðum ekki að fjármagna það,“ segir kórstjórinn Halldór Gunnar, sem ætlar ekki að láta sama vandamál stöðva hópinn í þetta sinn. „Við erum búnir að vera að hugsa þetta síðan við urðum alvöru kór að það væri gaman að fara eitthvað saman, hvert sem það væri. Bara til að prufa hvernig það er að vera saman í rútu og á hóteli og syngja fyrir fólk sem veit ekkert um okkur og veit ekkert við hverju það á að búast. Þetta verður ævintýri, það er alveg á hreinu.“ freyr@frettabladid.is