Mínus í hlöðu á Húsafelli

Hljómsveitin Mínus hefur kveikt á hreyflunum aftur.

„Við komum okkur fyrir í hlöðu á Húsafelli og erum búnir að vera að vinna þar í þrjár vikur. Við stefnum að því að taka upp grunna að nýrri plötu í apríl,“ segir Bjössi trommari, sem er kominn frá Danmörku til að vinna með félögum sínum. Nýja platan verður fimmta plata Mínuss. Sú síðasta, The Great Northern Whalekill, kom út 2007.

Bjössi segir sveitasæluna leggjast vel í rokkarana. „Við hittum Pál á Húsafelli og fengum að spila á steinhörpuna. Hann gaf okkur stein. Að fara svona út á land og spila í stórhríð og finna fyrir snjónum og náttúrunni hefur vissulega áhrif á sköpunargáfuna. Nýja efnið er mjög frábrugðið því sem við höfum gert, það er mikil þróun í gangi og við erum spenntir yfir þessu. Við stoppum oft þegar við erum að spila og spyrjum hvort við megum gera þetta sem við erum að gera. Þetta eru lengri lög og þetta „grúfar“ meira. Við erum búnir að setja okkur þá vinnureglu að það verður ekki eitt „tjugga tjugga“ metal-riff á plötunni. Við viljum fara frá þeirri klisju.“

Í Danmörku hefur Bjössi verið að vinna og njóta þess að vera fjölskyldufaðir. „Ég er að leita mér að námi fyrir næsta vetur. Ég tek þetta bara á rólegheita­hraða,“ segir hann.

Fyrstu tónleikar Mínuss í langan tíma verða á Batteríinu, áður Organ, á föstudagskvöldið. „Biogen spilar með okkur. Við vildum fá raftónlistarmann því við vildum hafa okkar sett óhreyft. Þetta verða langir tónleikar, við spilum bæði nýtt efni og gamalt. Þetta verður flott gigg. Daginn eftir fljúgum við til Danmerkur og spilum á Íslandsbryggju á stað sem er kallaður Færeyingahúsið.“- drg