Reynsluboltar vilja feitt djobb hjá RÚV

„Ég get staðfest það, ég er búinn að sækja um," segir Björn Þórir Sigurðsson, markaðsstjóri Morgunblaðsins, sem sækist eftir stöðu dagskrárstjóra hjá Ríkissjónvarpinu en auglýst var eftir umsækjendum fyrir skömmu.

Umsóknarfresturinn rennur út á sunnudagskvöld en samkvæmt heimildum Fréttablaðsins liggja nokkrir reynsluboltar úr sjónvarpsgeiranum undir feldi og velta því fyrir sér hvort þeir eigi að sækja eftir einu valdamesta starfi í íslensku sjónvarpi.

Björn Þórir vildi að öðru leyti ekkert tjá sig um umsóknina en hann hefur áður gegnt sambærilegum störfum hjá bæði Skjá einum og Stöð 2. Eftir því sem Fréttablaðið kemst næst liggja nokkrir reynsluboltar nú undir feldi.

Meðal þeirra eru sjónvarpstjórarnir fyrrverandi Heimir Jónasson og Magnús Ragnarsson en Heimir var sjónvarpsstjóri Stöðvar 2 og Magnús hjá Skjá einum. Þá hefur nafn Maríönnu Friðjónsdóttur einnig verið nefnt sem og Ernu Kettler en hún var dagskrárstjóri erlends efnis hjá Stöð 2 og er nú hjá RÚV.

Þorfinnur Ómarsson, sjónvarpsmaður og fyrrverandi upplýsingafulltrúi viðskiptaráðuneytisins, hefur verið orðaður við starfið sem og Páll Baldvin Baldvinsson. - fgg