Fjalli um geldingar á svínum

Jón Bjarnason, sjávarútvegs- og landbúnaðarráðherra, hefur skipað starfshóp til að leysa úr þeim vanda sem steðjar að svínarækt í landinu. Hópnum er meðal annars ætlað að fjalla um aðbúnað og meðferð svína.

Fréttastofa fjallaði ítarlega í vikunni um geldingar á svínum. Hér á landi eru karlkyns grísir geltir án deyfingar eða verkjastillingar. Starfsmaður svínabúsins sker þá í punginn og slítur eistun út. Aðgerðin er gríðarlega sársaukafull fyrir grísina. Kjöt geltra grísa er án sérstaks bragð og lyktar sem getur komið af ógeltum grísum og er það megin ástæðan fyrir geldingunni.

Sigurborg Daðadóttir, dýralæknir og formaður dýraverndarráðs, gagnrýndi þessa aðferð í samtali við Vísi á þriðjudaginn. „Fyrir dýrið er að mínu mati óásættanlegt að það sé verið að gelda án deyfingar."

Fram kemur á vef sjávarútvegs- og landbúnaðarráðuneytisins að vandi svínaræktar á Íslandi hafi verið í umræðu að undanförnu og að greinin hafi á einum áratug gengið í gegnum tvö tímabil offramleiðslu, gjaldþrota og verðfalls afurða. Samhliða hafi þróunin verið í átt að aukinni samþjöppun í eignarhaldi. Mikil afskipti bankastofnana hafi síðan veikt samkeppnisgrundvöll smærri rekstrareininga.

Starfshópnum sem Jón hefur skipað er ætlað fjalla um málefni greinarinnar á breiðum grundvelli. „Þar koma til álita þau umfjöllunarefni aðbúnaðar og meðferðar svína sem sagt hefur verið frá í fjölmiðlum að undanförnu. Stefnt er að því að ný aðbúnaðarreglugerð líti dagsins ljós fyrir lok árs."