Barnamenningarhátíð á nesi og við flóa

Barnamenningarhátíð hófst í gær og fram á sunnudag verður viðamikil dagskrá í gangi um Reykjavík alla, nánast viðstöðulaust frá morgni til kvölds. Er best að líta á vef hátíðarinnar til að sjá hvaða er í gangi: http://barnamenningarhatid.is/dagskra/.

Það er víðar en í Reykjavík sem kallað er saman nú í vetrarlok: Listahátíð barna er nú haldin í fimmta sinn í Reykjanesbæ: hún er samvinnuverkefni Listasafns Reykjanesbæjar og allra tíu leikskóla Reykjanesbæjar. Hátíðin hefur vaxið og eflst með hverju ári og segja má að hún hafi orðið kveikjan að þeirri stóru barnahátíð sem nú verður haldin í Reykjanesbæ þar sem virðing fyrir börnum og störfum þeirra og þörfum er höfð að leiðarljósi. Yfirskrift listahátíðar barna árið 2010 er Hafið og á öllum leikskólum hafa börnin fræðst um hafið með margvíslegum hætti.

Alls kyns listaverk hafa litið dagsins ljós, æfðir hafa verið nýir söngvar um fiska og haf, sjávardýr hafa verið krufin og svona mætti lengi telja.

Hápunkturinn er sjálf listahátíðin sem sett verður með formlegum hætti í Duushúsum á morgun, síðasta vetrardag, kl. 10.30. Það er vel við hæfi að sá viðburður verði einnig upphafsatriði Barnahátíðar í Reykjanesbæ.

Á listahátíðinni verður leitast við að skapa neðansjávarheim í Listasal með öllum þeim undrum sem þar finnast.

Listasmiðja verður starfrækt í Bíósal sem stendur öllum bæjarbúum opin og þar verða einnig myndlistarverk frá öllum leikskólunum. Dagana 23.-30. apríl koma leikskólarnir í heimsókn og standa fyrir stuttri skemmtidagskrá sem er öllum opin. - pbb