Flipp í Eurovision

Í maí taka 39 lög þátt í Eurovision. Þetta er þremur löndum færra en síðast, Andorra, Tékkland, Ungverjaland og Svartfjallaland draga sig í hlé en Georgía snýr aftur til keppni.

Oftast hefur verið hægt að ganga að nokkrum flipplögum vísum í keppninni, en nú, þegar 31 lag er komið fram, er aðeins eitt flipp-lag komið. Það er frá Litháen, heitir „East European funk“ og er flutt af hljómsveitinni Inculto. Hljómsveitin hefur verið starfandi síðan 2003 og gefið út tvær plötur. Lagið er hratt með fönkuðum ska-takti og hefst á því að meðlimirnir fimm syngja það án undirleiks.

Að öðru leyti eru framlögin sem komin eru í keppnina frekar hefðbundin, þarna eru silkimjúkar ballöður, þjóðleg stuðlög og ekki svo þjóðleg stuðlög.

Annað athyglisvert og gleðilegt við keppnina í ár er að mun fleiri þjóðir syngja nú á eigin tungumáli. Í fyrra voru bara níu lög sungin á öðru tungumáli en ensku, en nú verða þau að minnsta kosti 14.

- drg