Þétt umferð

Umferð á Suðvesturhorninu hefur verið þétt í dag og gengið afar vel fyrir sig, samkvæmt upplýsingum sem fengust hjá lögreglu. Hvítasunnuhelgin er jafnan kölluð fyrstu stóra ferðahelgi ársins og árið í ár er engin undantekning.

Mikil umferð hefur verið um Suðurlandsveg undanfarna daga en hún hefur dreifst vel og gengið að mestu leyti áfallalaust fyrir sig, að sögn lögreglunnar á Selfossi. Lögregla hefur þó þurft að hafa einhver afskipti af ökumönnum vegna hraðaksturs og hjá þeim sem hafa verið með kerrur og tjaldvagna í eftirdragi.

Umferðin í umdæmi lögreglunnar á Akranesi hefur verið að aukast en gengur eins og smurð vél, líkt og lögreglumaður sem fréttastofa ræddi við orðaði það.