Vilja ólmir taka upp plötu

Breska hljómsveitin Arctic Monkeys ætlar að byrja á nýrri plötu um leið og tónleikaferð hennar um Norður-Ameríku lýkur í næsta mánuði. Í stað þess að taka sér frí eftir ferðina vilja meðlimir ólmir byrja að semja lög og taka upp.

Síðasta plata sveitarinnar, Humbug, kom út í fyrra við góðar undirtektir og vilja þeir félagar hamra járnið á meðan það er heitt. „Við hættum bráðum að fylgja þessari plötu eftir og erum mjög spenntir fyrir því að vinna í nýju lögunum. Við ætlum ekki að taka okkur frí,“ sagði trommuleikarinn Matt Helders.

Óvíst er hvort hljómsveitin endurtekur leikinn frá síðustu plötu og fær Josh Homme úr Queens of the Stone Age sem upptökustjóra. „Það er erfitt að segja. Báðir aðilar hafa áhuga á því en þeir hafa í nógu að snúast á svipuðum tíma og við ætlum að taka upp,“ sagði hann.