Lagði ferilinn nánast í rúst en er nú orðaður við Óskar

Eflaust hefði enginn reiknað með því að aðeins sjö árum eftir Gigli-ósköp Bens Affleck, sem fóru langleiðina með að rústa annars ágætan feril hans, að hann væri orðaður við Óskarinn. En það er nú engu að síður staðreynd.

Nýjasta kvikmynd hans, The Town, fór beint á toppinn í Bandaríkjunum en hún segir frá óförum leiðtoga glæpagengis í Boston sem verður ástfangin af starfskonu banka sem hann hyggst ræna. MTV-vefurinn hefur eftir miðasölusérfræðinginum Jeff Bock að yfirleitt séu septembermyndir ekki líklegar til afreka á Óskarnum.

„En ég held að það gegni öðru máli með The Town, hún komst í toppsætið og hefur fengið glæsilega dóma."

Jeff bendir einnig á þá skemmtilegu staðreynd að fyrir fjórum árum hafi The Departed, sem einnig gerðist í Boston, farið á toppinn í september. Og sú frábæra mynd eftir Martin Scorsese fór heim frá Kodak-höllinni með fimm Óskara. Phil Contrion, ritstjóri BoxOffcie.com-vefsins, spáir því að Mad Men-leikarinn Jon Hamm eða Jeremy Renner úr Hurt Locker eigi eftir að dúkka upp í aukahlutverks-flokknum. Affleck leikstýrir sjálfur myndinni en hún fær 8,4 á imdb.com og 94 prósent á rottentomatoes.com.

Hér er hægt að sjá sýnishorn úr myndinni.