Ross er hundfúll út í Rachel

David Schwimmer og Jennifer Aniston, sem léku elskuhugana Rachel og Ross í sjónvarpsþáttunum Friends, talast ekki við þessa dagana. Ástæðan er sú að Aniston var í viðtali við David Letterman fyrir hálfum mánuði síðan. Þar sagðist hún ekki hafa hugmynd um hverjum Schwimmer væri að fara að giftast. Unnusta hans til tveggja ára heitir Zoe Buckman og hafa þau ákveðið að gifta sig.

„David var ekki ánægður með að einn af svokölluðum vinum hans vissi ekki hverri hann væri að fara að giftast. Hann hefur verið með Zoe í tvö ár og var fúll yfir því að Jen skyldi ekki muna eftir henni," sagði heimildarmaður í samtali við Mail on Sunday.

Eins og flestir vita gekk á ýmsu í samskiptum Rachel við Ross í sjónvarpsþáttunum. Þau voru í sambandi um mánaðabil en hættu saman. Svo duttu þau í það saman og giftu sig undir miklum áhrifum Bakkusar. Svo eignuðust þau barn saman. En kærleikarnir virðast vera minni í raunveruleikanum.