Charlies í partí í Playboy-setrinu

„Við vorum að fá staðfestingu á að okkur er boðið í partí á mánudagskvöldið. Það er sko mikið ferli að komast inn í þessi playboypartí og allir verða að senda mynd og umsókn sem síðan er yfirfarin af starfsmönnum Playboy. Það má því kalla þetta ákveðinn heiður fyrir okkur að komast inn,“ segir Alma, söngkona í hljómsveitinni The Charlies, hlæjandi og viðurkennir að þær séu allar spenntar að berja Playboyhöllina augum en að þetta sé um leið mjög skrýtið og frekar fyndið.

Í staðfestingabréfi frá aðstandendum partýsins kemur fram að 3000 manns hafi sótt um að komast í partýið og að mikil öryggisgæsla verði á svæðinu enda margir frægir á gestalistanum.

Hljómsveitin The Charlies, sem er skipuð þeim Ölmu, Klöru og Steinunni, er að taka upp tónlist í samvinnu við eitt af virtari plötuútgáfum í heimi, Hollywood Records. Stúlkurnar fá að vinna með þeim bestu í bransanum og eru á næstunni að fara að hitta upptökustjórann JR Rotem sem meðal annars hefur unnið með Rihönnu og Britney Spears. „Lífið er bara alveg dásamlegt hérna. Við þurfum eiginlega að klípa okkur á hverjum degi til að fatta að við séum í raun og veru að upplifa drauminn okkar,“ segir Alma en lífið er spennandi í borg englanna.

Mikið fjaðrafok hefur verið í kringum Hugh Hefner síðustu daga en fyrrum kærasta hans, Kendra Wilkinson, var að gefa út ævisögu sína þar sem hún afhjúpar leyndardóma Playboy-veldisins. Það sem hefur vakið mesta athygli er að Wilkinson segir að stúlkurnar í partíunum hafi verið í röð inn á svefnherbergi Hugh Hefners. „Já, við erum aðeins búnar að vera að fylgjast með þessu en get sko lofað þér að við erum ekkert að fara að stilla okkur upp í neina röð,“ segir Alma glöð í bragði en stúlkurnar verða að láta sjá sig í partíum og á flottum skemmtistöðum sem er liður í að kynnast rétta fólkinu og koma sér áfram í hörðum bransa.

„Okkar hversdagur er reyndar frekar einhæfir en við förum á æfingu og erum svo uppi í stúdíói að taka upp alla daga,“ segir Alma en sveitin er núna að leggja lokahönd á fjögurra laga plötu sem mun koma út á næstunni. „Við erum með árs atvinnuleyfi og svo sjáum við bara til. Það er mjög erfitt að skipuleggja eitthvað í þessum bransa enda hlutirnir fljótir að breytast. Núna erum við að njóta augnabliksins og taka þetta allt inn,“ segir Alma en stúlkurnar sakna þó ástvinanna á Íslandi. „Það er alveg erfitt að vera svona langt í burtu frá öllum. Við komumst ekki heim fyrr en um jólin næst. Það er því mjög gott að vera þrjár saman hérna. Við gerum allt saman og það er því gott að okkur kemur vel saman.“ alfrun@frettabladid.is