Mottuþema í Nauthólsvík á morgun

Á morgun verður mottuþema á Ylströndinni í Nauthólsvík en þá

fá allir þeir sem skarta hári á efri vör heitan drykk í boði ÍTR að loknu sjósundi.

„Sjósund hefur notið mikilla vinsælda á undanförnum misserum og er ef til vill ekki að undra að hár vaxi vel á karlmönnum sem synda reglulega í ísköldu Atlantshafi að vetrarlagi," segir í tilkynningu.

Hraustir karlmenn með yfirvararskegg eru hvattir til að fá sér sundsprett á morgun við ströndina sem opin er milli klukkan 11-13 og 17-19.

„Það hefur myndast mikil stemming og samstaða meðal karlmanna í Mottu-mars en með þessu viljum við minna á átakið og leggja okkar lóð á vogarskálarnar. Við bjóðum því öllum körlum með mottur upp á heitan drykk að loknum sundspretti," er haft eftir Árna Jónssyni, deildarstjóra hjá ÍTR, í tilkynningunni.

„Með reglulegri hreyfingu og heilbrigðu mataræði er hægt að minnka verulega líkurnar á krabbameini og því finnst okkur tilvalið að hvetja sjósyndandi mottukappa til dáða og hvetjum jafnframt karlmenn til að hugsa vel um líkama sinn og læra að þekkja helstu einkenni krabbameins."