Zuckerberg ánægður með fatavalið

Stofnandi samskiptavefjarins Face­book, Mark Zuckerberg, ákvað að bjóða öllu sínu starfsliði á myndina The Social Network. Myndin, sem er leikstýrt af David Fincher, á að fjalla um líf Zuckerbergs og uppruna Facebook og hefur Zucker­berg nú viðurkennt að honum líki við þessa Hollywood-útgáfu af sínu eigin lífi. Samt vill hann ekki meina að margt í myndinni eigi neitt skylt við raunveruleikann. „Það eina sem er nokkurn veginn eins er fataval Jesse Eisenberger. Þeir náðu að herma eftir mínum fatastíl og ég held að ég hafi meira að segja rekið augun í alveg eins sandala og ég á í myndinni,“ segir Zuckerberg í viðtali en áður hafði þessi 26 ára gamli auðkýfingur gefið út yfirlýsingar þess efnis að hann ætlaði ekki sjá myndina.

Hann vill samt meina að áherslurnar í myndinni séu rangar og að hann hafi til að mynda ekki stofnað Facebook til að næla sér í stelpur eins og ýjað er að í myndinni. „Þeir eru alveg búnir að gleyma þeirri staðreynd að ég er búinn að eiga sömu kærustu frá því áður en ég stofnaði Facebook,“ segir Zuckerberg og vill einnig meina að leikstjórinn hafi eytt of miklu púðri í kærumálið sem hann sjálfur hafi einungis hugsað um í tvær vikur.

„Eftir allan þennan tíma er sorglegt að þeir skuli ennþá vera að hugsa um þetta mál,“ segir Zuckerberg en myndin hefur átt velgengni að fagna og hafa spekingar í kvikmyndabransanum meðal annars spáð henni góðu gengi á Óskars­verðlaununum á næsta ári.