Viðtal: Móðir 3 ára drengs með bráðahvítblæði

Við höfðum samband við Eddu Viðarsdóttur móður þriggja ára gamals drengs sem heitir Emil Ágúst Þórisson.

Emil greindist með bráðahvítblæði í janúar 2010. Síðan þá hefur hann verið í mjög erfiðri meðferð sem hefur reynt mikið á hann og alla hans fjölskyldu.

Til að létta undir með fjölskyldunni hafa nokkrir vinir foreldra Emils, Eddu og Þóris Úlfarssonar, ákveðið að standa fyrir tónleikum þeim til styrktar.

Tónleikarnir verða haldnir í Salnum Kópavogi fimmtudaginn 10.júní klukkan 20:00.

„Vinir og vandamenn sjá um að halda styrktartónleikana fyrir okkur," segir Edda og heldur áfram:

„Hannes Friðbjarnarsson í Buff á heiðurinn af þessu glæsilega framtaki ásamt mörgum öðrum vinum okkar," segir Edda í upphafi samtals okkar áður en við spyrjum um heilsu Emils.

Hvernig hefur Emil litli það? „Hann hefur það svona ágætt í dag. Hann er búinn að vera mjög lasinn. Það er misjafnt hvernig börn bregðast við lyfjunum."

„Hann hefur verið mjög lasinn síðan hann greindist í byrjun janúar á meðan önnur börn þola lyfin aðeins betur. Hann hefur ekki labbað í rúma þrjá mánuði. Aukaverkanirnar sem hann er að fá eru slæmar, hann er voðalega óheppinn hvað það varðar," segir Edda.

„Við foreldrar Emils höfum ekkert getað unnið. Ég er heima í fæðingarorlofi. Bróðir hans, Viðar Snær, varð átta mánaða í fyrradag (6. júní). Hann var tveggja mánaða þegar Emil greindist. Ég á tvær eldri dætur og Þórir einn eldri son og svo eigum við þá tvo saman" segir Edda.

Eru batahorfur góðar hjá Emil? „Batahorfurnar hjá börnum með ALL tegundina af hvítblæði eins og Emil er með eru um 85% en nær 90% á Íslandi vegna góðrar meðferðar hjá krabbameinsveikum börnum," segir Edda.

„Við erum frekar bjartsýn með batahorfur hjá Emil enda vona ég að hann sé komin yfir erfiðasta hjallann en tvö ár eru enn eftir af meðferðinni svo að við erum bara rétt farin að stað og við vonum að Guð verði Emil, litlu hetjunni okkar hliðhollur í þessari miklu baráttu."

Síðan á Facebook um styrktartónleikana fyrir Emil litla.