Europe-stjóri aðstoðaði Noise

Bandaríski upptökustjórinn Beau Hill lagði lokahönd á þriðju plötu rokksveitarinnar Noise sem kemur út á mánudaginn. Hann er þekktastur fyrir að hafa tekið upp plötur með Alice Cooper, Warrant og Europe og hafa þær útgáfur selst í hátt í fimmtíu milljónum eintaka.

„Hann samdi víst brúna í The Final Countdown. Hann var að monta sig á því,“ segir Stefán Vilberg, bassaleikari Noise, og á þar við hinn ódauðlega slagara Europe. „Hann fann okkur á Myspace og fílaði Wicked-plötuna okkar sem við gáfum út 2006. Hann setti sig í samband við okkur og spurði hvort okkur vantaði aðstoð. Það endaði með því að við fengum hann til að „mastera“. Hann breikkaði „sándið“ á plötunni alveg um helming. Hann er mjög fær,“ segir Stefán. Hann bætir við að platan, sem heitir Divided, sé aðeins aðgengilegri en fyrri verk Noise og örlítið poppaðri.

Stefán og bróðir hans Einar eru einu upprunalegu meðlimirnir í Noise sem eftir eru. Nýir meðlimir eru Egill Rafnsson og Arnar Grétarsson sem áður voru í Sign. Noise hefur spilað töluvert erlendis í gegnum árin, þar á meðal í Bretlandi, Hollandi og Belgíu. Á síðasta ári var sveitin tilnefnd til Pure Rock-verðlaunanna í Bretlandi sem besti nýliðinn.

Fyrsta smáskífulagið af nýju plötunni, A Stab in the Dark, er komið í útvarpið, auk þess sem myndband við lagið er komið í loftið. Útgáfutónleikar eru svo fyrirhugaðir í byrjun október. - fb