Enn takmarkanir á flugumferð

Enn eru miklar takmarkanir á flugumferð um landið vegna öskunnar úr Eyjafjallajökli. Ekki er hægt að nota Keflavíkurflugvöll fyrir millilandaflug og fer það því enn um flugvellina á Akureyri og á Egilsstöðum.

Aska liggur enn yfir Keflavíkurflugvelli og er því ekki hægt að nota hann til áætlunarflugs. Enn er ekki vitað hvenær flug kemst í eðlilegt horf en áætlun Icelandair gerir ráð fyrir að óbreyttri stöðu fram á þriðjudag. Flugvöllurinn í Glasgow verður miðstöð millilandaflugs Icelandair og þotur Icelandair fljúga þaðan til og frá Bandaríkjunum og til og frá áfangastöðum í Evrópu.

Guðjón Arngrímsson, upplýsingafulltrúi Icelandair, segir að flugfélagið sé að fljúga til Bandaríkjanna frá Glasgow og sömuleiðs frá Glasgow til Evrópuborganna. Hann segir að það hafi gengið framar vonum. Þá sé jafnframt fragtflug frá Akureyrarflugvelli.

Þá hefur öllu innanlandsflugi Flugfélags Íslands er aflýst en næstu upplýsingar þar verða birtar á síðu flugfélagsins nú rétt eftir hádegi.

Flugfarþegum er sem fyrr bent á að fylgjast vel með upplýsingum um flug hjá flugfélögunum á vefsíðum þeirra.