Forgangur Ölfuss er fallinn úr gildi

Orkuveita Reykjavíkur hefur hafnað ósk Ölfuss um að framlengja forgangsrétt verkefna í sveitarfélaginu að orku frá Hverahlíðarvirkjun.

„Okkar forgangur rann út 1. maí,“ segir Birna Borg Sigurgeirsdóttir, forseti bæjarstjórnar Ölfuss. „Við leituðum eftir framlengingu en Orkuveitan vísaði því á bug.“

Áfram er þó unnið að hugmyndum um að fyrirtækið Timminco byggi kísilverksmiðju við Þorlákshöfn og knýi hana með orku frá Hverahlíðarvirkjun.

Orkuveitan á nú bæði í viðræðum við Timminco og Norðurál um kaup á þeirri orku, að sögn Eiríks Hjálmarssonar, upplýsingafulltrúa OR, sem segir stefnt að því að „klára mál Timminco í maí“.

Gunnar Jónsson, lögmaður Thorsil, en það félag er í eigu Timminco og Stokks Energy og vinnur að undirbúningi kísilverksmiðjunnar, segir að fyrirtækin hafi enn áhuga á að reisa kísilverksmiðjuna. Áætlanir um að ljúka málinu fyrir 1. maí hafi verið óraunhæfar þótt tekist hafi að ljúka þeirri verkfræðivinnu sem stefnt var að fyrir þann tíma.

Næstu skref gætu ráðist á stjórnarfundi Orkuveitunnar 12. maí þar sem fjallað verði um hugmyndir um framlengdan samningsramma. Gunnar staðfesti að samningsstaða kísilverksmiðjunnar væri veikari nú þegar Ölfus nýtur ekki lengur forgangs og álver Norðuráls í Helguvík knýr einnig á um aðgang að orku Hverahlíðarvirkjunar.

„Það stendur til að halda áfram á fullu. Ég veit að hugur Orkuveitunnar stendur mjög til að þetta geti orðið,“ sagði Gunnar. „En hlutirnir hafa tekið lengri tíma en við vonuðum.“

Timminco hefur staðið höllum fæti fjárhagslega. Gengi þess á hlutabréfamarkaði í Kanada rýrnaði um þriðjung skömmu fyrir síðustu mánaðamót. Fyrr á árinu tilkynnti Timminco að það hefði hætt framleiðslu á kísilflögum vegna minnkandi sölu en mundi byrja aftur ef markaðsaðstæður batna. Unnið hefur verið að endurskipulagningu, meðal annars með breytingu skulda í hlutafé.

Gunnar Jónsson segir að viðræður standi yfir við öflug fyrirtæki um kaup á framleiðslu væntanlegrar verksmiðju. Traustur sölusamningur sé ein forsenda þess að verksmiðjan geti risið.

peturg@frettabladid.is