Segja stjórnarformann gagnavers sitja beggja vegna borðsins

Stjórnarformaður Verne Holdings, Vilhjálmur Þorsteinsson, sem vill reisa gagnaver í Reykjanesbæ, er einnig formaður stýrihóps iðnaðarráðherra um orkustefnu. Þetta kemur fram í áliti minnihluta iðnaðarnefndar sem Hreyfingin sendi frá sér en í álitinu segir ennfremur:

„Vilhjálmur situr því beggja vegna borðsins að því leyti að hann vinnur fyrir iðnaðarráðuneytið á sama tíma og ráðherra iðnaðarmála er að semja við fyrirtæki sem hann er stjórnarformaður fyrir. Slíkt getur varla talist ásættanlegt og hlýtur vera hans á öðrum hvorum staðnum að gera hann óhæfan til að vera á hinum."

Hreyfingin bendir einnig á að Vilhjálmur hafi setið í 9. sæti á lista Samfylkingarinnar í Reykjavíkurkjördæmi Suður fyrir síðustu alþingiskosningar. Hreyfingin telur það óeðlilegt í ljósi þess að iðnaðarráðherra er úr Samfylkingunni.

Gagnaverið hefur vakið gríðarlega hörð viðbrögð vegna aðkomu Björgólfs Thors Björgólfssonar að verkefninu.