Langar að opna hótelkeðju

Paris Hilton, 29 ára, sem hefur tekist á við ýmislegt í gegnum tíðina eins og sjónvarpsþáttagerð, söng, ilmvatnsframleiðslu og leiklist hefur áhuga á að demba sér út í hótelrekstur líkt og fjölskylda hennar.

Paris ætlar sér að fræðast betur um hótelrekstur eftir að hafa gert það gott í skemmtanabransanum.

„Ég er búin að takast á við nánast allt sem ég get hugsað mér að gera. Ég ætla að demba mér út í viðskipti sem tengjast hóteliðnaði. Næsta skref er að opna mína eigin hótelkeðju," sagði Paris

Ekki er vitað hvort Paris fái leyfi til að nota Hilton nafnið en á meðan hún undirbýr hótelreksturinn gefur hún sér tíma til að horfa á sjónvarpsþættina True Blood sem sýndir eru á Stöð 2 á miðvikudagskvöldum.

„Ég hef ekki mikinn tíma til að horfa á sjónvarp af því að ég hef svo mikið að gera og er alltaf á ferðinni en það er einn þáttur sem ég elska og það er True Blood. Kannski fæ ég að leika vampíru einhvern tíman. Það væri frábært," sagði hún.