Ný Kríu skartgripalína: Innblástur frá list

„Nýja línan er undir áhrifum frá "tribal" málverkum eiginmanns míns, listamannsins Pauls Weil. Við vörpuðum meðal annars einu verka hans á fyrirsætuna fyrir myndatökuna í staðinn fyrir að klæða hana í föt eða nota farða," segir skartgripahönnuðurinn Jóhanna Metúsalemsdóttir um nýja skartgripalínu sína, en hún hannar undir nafninu Kría.

Þetta er önnur línan frá Kríu og var Jóhanna í um þrjá mánuði að vinna hana. „Þetta er önnur línan mín en annars bý ég bara til nýtt skart þegar mér er mál að gera eitthvað. Það mætti eiginlega segja að fyrsta línan hafi komið út í þremur hollum og það er ekki ólíklegt að það verði eins með þessa línu, að ég bæti við hana ef mér dettur eitthvað sniðugt í hug," útskýrir Jóhanna.

Fyrri línan hefur verið fáanleg á vefnum, í Aurum á Bankastræti, Icelandicmarket.com og í vel völdum verslunum í Bandaríkjunum. „Það er ekki búið að reyna mikið á sölu á nýju línunni þar sem hún er bara rétt komin inn á heimasíðu Kríu. Eitthvað hefur borist af persónulegum pöntunum beint til mín en ég er mjög vongóð um að línan muni seljast vel þar sem "lookbook" sem ég gerði hefur vakið mikla lukku." Hægt er að skoða nýju línuna nánar hér á Facebook-síðu Kríu.

Skart frá Kríu var notað í tískuþátt í marshefti tískutímaritsins Purple Magazine og var það hinn heimsþekkti ljósmyndari Terry Richardson sem tók myndirnar. Að sögn Jóhönnu er það mikil viðurkenning að fá hönnun sína birta í tímariti sem þessu.

„Þetta eykur umtal og forvitni og vonandi leiðir þetta svo til þess að fleiri verslanir vilji kaupa Kríu skartið. Þetta helst allt voða mikið í hendur, það er að segja ef þú ert í vinsælu blaði í tískuþætti sem myndaður er af þekktum ljósmyndara þá er maður í góðum málum," segir Jóhanna að lokum kampakát. - sm